Dowladda UK ayaa ka fekereysa inay qaar ka mid ah dembiilayaasha ka sii deyso xabsiyada England iyo Wales si loo ayreeyo baqdinta ka dhalatay xanuunka safmareenka ah ee coronavirus.
Xoghayaha Caddaaladda, Robert Buckland, ayaa sheegay in fayrasku uu khatar ka abuuray gudaha xabsiyada, oo qaarkood ay buux dhaafeen.
Illaa 3,500 oo shaqaalaha xabsiga ah ayaa shaqada ka maqnaa Talaadadii, sababo la xiriira inay xanuunsadeen amaba ay qaarkood is karantiileen.
Mr Buckland ayaa sheegay in sii deynta qaar ka mid ah maxaabiista ay sahli karto yareynta baqdinta laga qabo fayraska.
Xoghayaha Caddaaladda ayaa guddiga caddaaladda u sheegay inuu rajeynayo in maxaabiista muddo gaaban la sii daayo, ka dib marka qiimeyn lagu sameeyo.
Mr Buckland ayaa intaas ku daray inuu aad uga fiirsanayo in 50 maxaabiis oo haween uur leh ah la sii daayo iyo inkale.
Wuxuu sheegay in laga yaabo in illaa 9,000 maxaabiis oo xukun sugayaal ah, loo wareejiyo meelaha lagu hayo dadka damaanadda ku jooga.
Madaxa siyaasadda iyo arrimaha dowladda hay`adda Amnesty International ee UK, Allan Hogarth, ayaa sheegay in maxaabiista da`da ah iyo kuwa qaba xaaladaha caafimaad si degdeg ah looga fekeri doono in la sii daayo “haddii aysan khatar gelineynin naftooda iyo tan bulshada”.
