Waa War Aan Jirin Oo Been Abuur Ah Inaan La Kumay Safiirka Qatar, Prof. Samatarna Waa Kii Sheegay Inuu Kulmiye Yahay Ee Yaanay Dawladu Ka Shakiyin

0

Guddoomiyaha xisbiga WADDANI Dr Cabdiraxmaan Maxamed Cabdillaahi Cirro ayaa ku dooday inaanu jirin kulan uu magaalada Nayrobi kula yeeshay danjiraha dawladda Qatar u fadhiya Muqdisho, oo maalmihii u dambeeyay la isla dhex marayay, wuxuuse sheegay inaanu jirin wax ka hor istaagaya inuu kulamo la yeesho safiirada. Shirjaraa’id oo uu shalay Hargeysa ku qabtay ayuu kaga hadlay arrintan iyo arrimo kaleba.

Ugu horayn Cabdiraxmaan Cirro waxa uu eheladooda iyo bulshada Somaliland ka tacsiyeeyay muwaadiniinta ku naf waayay roobkii Hargeysa ka da’ay iyo hantidii uu wax yeelay waxaanu masuuliyad darro ku eedeeyay madaxda masuuliyadda lahayd “Waxa aan odhan kara waa fool xumo weyn in balligii Daami ee sanadkii horena madaxweynuhu ka bixiyay amarka wali khatartii ay sideedii tahay. Madaxweynuhu wuxuu sanadkii hore amar ku bixiyay in wax laga qabto, madaxweynihii amarka bixiyay iyo maayarkii uu amarka siiyayna xalay way wada socdeen balliguna waa sidiisii wali,” Sidaas ayuu yidhi Dr Cabdiraxmaan Cirro.

Guddoomiye Cabdiraxmaan Cirro waxa uu sheegay in ay habboon tahay in aanay Somaliland kala jeclaysan Waddamada Caalamka maaddaama ay citiraaf raadis tahay dal kastana cod ku leeyahay Qaramada Midoobay. Waxa uu sheegay in aanay jirin siyaasad Somaliland u taalla oo dalalka qaar mamnuucaysa sidaas awgeedna aanay waxba ka hor taagnayn in uu la kulmo safiirrada Qadar iyo Maraykanka laakiin aanu jirin warka hadda sheegay in uu Nairobi kula soo kulmay.

“Waxaad ka war qabtaan in aan sanadkii hore January tagay Nairobi oo aan kula kulmay in ka badan 10 safiir waxaan kala hadlayna waxa ay ahayd siyaasadda arrimaha dibadda, arrimaha Somaliland, arrimaha doorashooyinka iyo arrimaha citiraafka. Maalmahan waxa jirtay saxaafadda qaarkeed malaha qaar la yaqaannaba may ahayne in aan kula kulmay danjiraha Qadar iyo danjiraha Maraykanka magaalada Nairobi warkaasi ma jiro waa war been abuur ah laakiin, kama duwana safiirka Qadar kuwii aan la kulmay ka Maraykankuna kama duwana wax noo diidaya in aanu la kulano safiirro gaar ahna ma jiro, taas macnaheedu waxa weeye cidna nooma yeedhin karto cidda aanu la kulmayno. Danjireyaasha dhammaantoodba waanu la kulmi karna kuwaas la sheegay iyo kuwo kaleba, diyaar baanu u nahay kuwaas la sheegay ee Qadar iyo Maraykanku ka mid yihiin iyo kuwa kale ee Dunidaba in aanu la kulano xilli kasta oo munaasib ah meel kasta oo munaasib ah, aniga oo qudha maaha ee waxaa la kulmi kara xisbi ahaana waanu la kulmi karnaa masuuliyiinta xisbiguna way la kulmi karaan waxa aanu kala kulmaynaana waa danta Somaliland,” Sidaas ayuu yidhi Guddoomiye Cabdiraxmaan Cirro.

Xadhigga Xildhibaan Dhakool

Guddoomiyaha xisbiga WADDANI Dr Cabdiraxmaan Cirro waxa uu Dastuur jabin ku tilmaamay xadhigga xukuumaddu kula kacday Xildhibaan Maxamed Axmed Dhakool oo ka tirsan Golaha Wakiillada Somaliland “Qof kasta oo muwaadin ah sharcigu wuu xidhi karaa laakiin, waa in dariiq sax ah loo maraa. Mudaneyaasha Golaha Wakiillada Dastuurka oo ah sharciga ugu sareeya dalka ayaa xasaanad siiyay, Dastuurka sharci ka sareeyana ma lihin, mudanaha ka tirsan Wakiillada ama Guurtida lama xidhi karo lamana baadhi karo, marka waxa dhacday in xildhibaanka goor habeenimo ah isaga oo waliba hurda oo aan wax dambi ah faraha kula jirin la qabtay, marka taasi waa dastuur Jabin, madaxweynahaana ugu sareeya in uu ilaaliyo dastuurka, madaxweynaha laftiisu haddii uu dastuurka jabiyo ee dastuurku wuu tilmaamaya tallaabooyinka laga qaadayo,” Sidaas ayuu yidhi Guddoomiye Cabdiraxmaan Cirro.

Guddoomiyaha xisbiga Waddani waxa uu intaasi raaciyay in ay la yaab noqotay in wali xildhibaan Dhakool xidhan yahay iyada oo guddoomiyaha Maxkamadda gobolka Maroodijeex iyo guddida joogtada ah ee golaha wakiillada metelaysa markii ay Dastuurka arkeen ku gacan saydheen xadhigga una arkeen sharci jabin. Waxa kale oo uu cambaareeyay in guddoomiyaha Wakiillada oo ah masuulka 3-aad ee Qaranka, xildhibaannada iyo ehelkiisaba laga hor istaago in ay arkaan Xildhibaan Dhakool.

“Xadhiggiisu(Xildhibaan Dhakool) sidiisaba waa Dastuur Jabin haddii aynu shuruucda ku tumanana waxa uun ka dambeeya fawdo, mar walba in la ixtiraamo shuruucda iyo dastuurka waxay dantu ugu jirtaa marka koobaad cidda xukunka haysa. Rayigiisa kuma waafaqsanin (Dhakool) laakiin, wuu dooday oo wax buu yidhi waxaana Dastuurka ku qoran ra’yigiisa laguma xidhi karo mudanaha Golaha Wakiillada, haddiise ay dambi u aragto ciddii dambi u aragtaa waa in ay u soo marto dariiqa saxda ah oo ay golaha waydiisato in laga qaado xasaanadda markaa kadib uun.. Marka waxaanu u soo jeedinayna madaxweynaha iyo xukuumaddiisa in sharciga loo soo noqdo in dastuurka loo soo noqdo mudanahana xorriyaddiisa loo soo celiyo,” ayuu yidhi Mudane Cabdiraxmaan Cirro.

Guddoomiyaha ayaa intaasi raaciyay in xukuumaddu sii waddo xadhigga muwaadiniinta “Waxa ugu dambeeyay guddoomiyihii garabka dhallinyarada Maxamed Sidiiq, xukuumaddu waxay tidhi way na caayeen haddii cay la isku xidhxidhayo Ina Muuse Diiriye in la soo xidho ayay ahayd iyo wasiirka gaadiidka haddii cay la isku xidhayo oo sharci cayda xidhaya uu jiro maalin walba waxa caytama masuul ka tirsan xukuumadda, marka waa in sharciga loo sinnaado oo iyagana la xidho oo jeelka la geeyo markaas ayaan odhan karna caddaalad baa jirta,’ Sidaas ayuu yidhi Dr Cirro oo soo jeediyay in la soo daayo Maxamed Sidiiq Dhamme guddoomiyaha garabka dhallinyarada Waddani, Samafale Cabdimaalik, Abwaan Baashe, macallin Cabdiqaadir iyo dadka kale ee xidhan.

Ugu dambeyn Guddoomiyaha xisbiga WADDANI Dr Cabdiraxmaan Cirro waxa uu bulshada Somaliland la wadaagay hambalyada maalinta Qaran ee 18 May “ Waxaan doonaya aniga oo ku hadlaya afka xisbiga in aan shacbiga Somaliland u soo qaddimo hambalyada maalinta la soo noqoshada Qarannimada Somaliland oo ah 18 May. Dhammaan xisbigu wuxuu diyaar u yahay in uu ka qayb galo munaasibadaheeda kala duwan ee maalintaasi leedahay dalka gudihiisa iyo dibaddiisaba haddii Alle yidhaa, maalmo kale oo Qarrana waynu leenahay oo la xusi doono oo ay ka mid tahay maalintii aynu calanka ka qaadanay Ingiriiska ee 26-ka June maalmaha Qaranka dhammaantoodna waxay mudan yihiin in la wayneeyo,” ayuu yidhi Dr Cabdiraxmaan Cirro.

Mar la weydiiyay ujeedada safarkiisii Nayrobi, wuxuu yidhi “ Arin gaar ah ayaan u tagay Nayroobi laba casho ayaan ku maqnaa Professor-kana diyaarada ayaanu ku kulanay, Professorkuna waa kii sheegay inuu Kulmiye yahay ee yaanay dawladu ka shakiyin.”

Geeska